Ao redor de medio centenar de traballadores do hospital comarcal de Valdeorras volveron onte a concentrarse ás portas do centro para protestar contra unha posible supresión da área sanitaria. Defenden desde a comisión de centro que o desmantelamento da área comeza pola tendencia da dirección de non cubrir as vacantes que van quedando; e o seu rexeitamento transmitíronllo á xerente, María Jesús Magadán, nunha reunión celebrada días atrás.

Na mesma, Magadán respondeu á pregunta dos traballadores que non era a súa intención cubrir «a falta dun traumatólogo». «A contestación foi que nestes momentos non fai falta», explicaba o membro da comisión, Víctor Parente, aos presentes na concentración (que mostraba a súa reprobación movendo a cabeza). En cambio, segundo a xerencia, «si fai falta un cirurxián, e vano a contratar, ou esa é a idea», trasladaba despois Parente. O sindicalista rexeitaba a afirmación de que non é preciso ocupar esa praza, «cando en traumatología está a facerse prolongación de xornada». Ademais, criticou duramente que se estean pagando horas extra «cando se nos dixo que non había diñeiro cando pedimos unha enfermeira e unha auxiliar máis para a planta de medicamento interno»; polo que consideran que se está xerando «unha situación de amiguismo».

Preparando a manifestación

Desde a comisión de centro defenden que esta situación está a xerar unha crise «asistencial» cara aos pacientes. Conscientes de que a crise económica non deixa marxe de manobra para pedir o incremento de servizos, «si demandamos que se cubra o que xa estaba orzado». Esta situación será unha das que se denunciará na manifestación convocada para o vindeiro xoves día 3. Será a partir das oito da tarde, co punto de partida no pavillón de Calabagueiros. O remate será na praza do Concello, segundo explicaban onte desde a comisión de centro despois de elixir o percorrido. Na decisión baralláronse outras opcións, como rematar na praza Maior ou ata en Viloira, pero finalmente decidiuse rematar ante o consistorio.

A plataforma organizadora, ademais, recibiu o mércores o apoio do foro Valdeorras século XXI. Foi no transcurso dunha reunión convocada para analizar a situación actual dos servizos sanitarios na comarca. Desde o foro resaltaron «a importancia que ten o mantemento da área sanitaria desde lle punto de vista do benestar dos cidadáns e como motor económico da comarca», polo que fixeron un chamamento aos colectivos integrados para que apoien os actos reivindicativos promovidos pola plataforma.